Bréf til foreldra

Þú ert hér: ://Bréf til foreldra
Bréf til foreldra 2013-10-04T13:42:51+00:00

Söfnun fermingarbarna fyrir hjálparstarf kirkjunnar

Kæru foreldrar fermingarbarna.
Meðal þess sem fermingarbörnin fá að kynnast í vetur er þróunar- og hjálparstarf á vegum kirkjunnar í landinu og þar á meðal kirkjunnar okkar.
Við njótum samstarfs við starfsfólk Hjálparstarfs kirkjunnar sem hefur útbúið efnið sem við notum, skyggnuflokk um líf unglings í Afríku.
Fermingarbörnin fá að kynnast þeim erfiðleikum sem við er að etja í fátækum löndum og við munum ræða ábyrgð okkar á því að allir jarðarbúar fái lifað mannsæmandi lífi.
Síðan er ætlunin að fermingarbörnin gangi í hús og safni framlögum til hjálpar í þeim aðstæðum sem kynntar hafa verið.
Mörg hafa reynslu af því að ganga í hús úr íþrótta- og félagsstarfi. Þau fá leiðbeiningar frá okkur áður en þau leggja af stað, tvö og tvö saman.
Ykkur foreldrum er velkomið að ganga með þeim eða aðstoða við að koma þeim af stað með baukana og taka á móti þeim aftur hér í kirkjunni.
Það væri vel þegið.

Sameiginlegur söfnunardagur allra sem taka þátt í þessu verkefni er áætlað að verði vikuna 3. nóvember – 10. nóvember.
Í samstarfi við Hjálparstarf kirkjunnar, sem okkar kirkja stendur að, höfum við skipulagt söfnun í sókninni okkar.
Fermingarbörnin koma í messu á sunnudeginum og sækja söfnunarbauka Hjálparstarfsins og velja sér götur að ganga með baukana.

Við teljum að með þessari fræðslu getum við frætt fermingarbörnin um boðskap Krists á áþreifanlegan hátt. Hér skapast mótvægi við síbylju neikvæðra frétta og tækifæri til að skynja að öll getum við lagt eitthvað af mörkum.

Á unglingsárum þegar skilningur vex og ungt fólk er að móta sér lífsstíl er mikilvægt að fá að setja sig í samhengi við aðra í heiminum og skynja kraft sinn til þess að breyta rétt og hafa áhrif.
Um leið metum við meira þá gæfu sem við njótum hér á Íslandi.

Verkefni þetta er árviss atburður sem hefur skilað miklu til þeirra sem við taka en ekki hvað síst fermingarbarnanna sem standa að söfnuninni.

Fermingarbörn  um land allt taka þátt í þessu verkefni. Við vonum að þið takið undir með okkur í þessu, ræðið við og hvetjið börnin ykkar.

Með bestu kveðju,

Séra Gunnar Sigurjónsson
Séra Magnús Björn Björnsson